ఆహార నియమాలు

* ఆమము , విదగ్ధము , విష్టంభము , రసశేషము అను భేదములచే అజీర్ణము నాలుగు విధములుగా ఉండును. వీటన్నిన్నిటికి మజ్జిగ ఔషధముగా పనిచేయును .

* భోజనాంతరము చేతిని కడుగుకొనిన తరువాత అరచేతితో నేత్రములను తుడుచుకొనిన గాని , అరచేతితో నీటిబొట్టును నేత్రములలో వేసుకొనినగాని నేత్రరోగములు మానును .

* భోజనము చేసి పనిలేకుండా కూర్చుండువాడు లంబోదరుడు అగును . భుజించిన తరువాత శయనించువారికి సుఖము కలుగును. భోజనము చేసి కొంత సమయము తరువాత శ్రమించువానికి ఆయుర్వృద్ది కలిగి మరణము దూరము అగును.

* ఆకలిగా ఉన్నప్పుడు భుజించుతూ , ఎడమవైపు తిరిగి పడుకొనినవానికి వైద్యునితో పని ఉండదు.

* ఆకలితో ఉన్నవాడు సమయానికి భుజించని యెడల కట్టెలు లేని ఆగ్నిహోత్రము వలే జఠరాగ్ని నశించి శరీరము కృశించును .

* భోజనం చేసిన పిమ్మట ఎడమప్రక్కకు తిరిగి పడుకుండిన యెడల పిత్తాశయము నుండి ఆహారం జీర్ణం అగుటకు కావలసిన పైత్యరసము సరిగా ప్రసరించి జఠరాగ్ని వృద్ది అగును. కావున భోజనానంతరం ఎడమప్రక్కకు తిరిగి పడుకొనవలెను .

* నిద్రపోవు కాలము నందు ఎడమప్రక్కన పరుండినప్పుడు 32 సార్లు , కుడివైపు పరుండినప్పుడు 25 సార్లు ఉచ్ఛ్వాస నిచ్ఛ్వాసములు వెడలును. ఇతర విధముల పరుండప్పుడు పదిసార్లు కలుగును.

* అనవసరముగా ఔషధసేవన చేయుట , కుడివైపు ఎక్కువుగా పడుకోవడం , భోజనమునకు బదులు ఇతరవస్తువులు భుజించటం వలన మనుష్యునకు తృప్తి కలగవచ్చును కాని అనారోగ్యం తప్పక కలుగును .

* జఠరాగ్ని ఆహారమును వచింప ( జీర్ణం ) చేయును . ఆహారం లేనివారికి ఈ జఠరాగ్ని శరీరమునే దహింపచేయును . దానివల్ల సర్వధాతువులు క్షీణించి ప్రాణములు కూడా పోవును .

* భోజనం చేసిన పిమ్మట భుక్తాయాసం తగ్గువరకు కొంచంసేపు విశ్రాంతి తీసికొనవలెను . తరువాత 100 అడుగులు అటుఇటు తిరగవలెను. కుర్చొని లేచుచూ ఉండవలెను .

* భుజించిన ఆహారం మరునాటికి రసధాతువుగాను , మూడొవ రోజుకి రక్తముగాను , నాలుగొవ రోజుకి మాంసముగాను , అయిదోవ రోజుకి మేధస్సుగాను , ఆరోవరోజుకి అస్థిధాతువుగాను , ఏడోవ రోజుకి మజ్జి ధాతువుగాను , ఎనిమిదొవ నాటికి ఉత్క్రుష్టమైన శుక్రధాతువుగా మారును .